Rules%20of%20Prudence%20-%20Tamil%20Header_edited.jpg
 
WP MPs.jpg

அறிமுகம்

  1. நீங்கள் நாடாளுமன்ற உறுப்பினராக (எம்பி) தேர்ந்தெடுக்கப்பட்டமைக்குப் பாராட்டுகள்.

  2. நீங்கள் நாடாளுமன்றச் சத்தியப் பிரமாணம் எடுத்து, உங்களில் சிலர் தேர்ந்தெடுக்கப்பட்ட நகர மன்ற அதிகாரியாகப் பொறுப்புகளையும் கடமைகளையும் பழக்கப்படுத்திக் கொண்டுவிட்ட இத்தருணத்தில் இந்தக் கடிதத்தை உங்களுக்கு எழுதுவது பொருத்தமான நான் கருதினேன்.

  3. நீங்கள் ஒரு நாடாளுமன்ற உறுப்பினராக மேற்கொள்ளும் அனைத்து பணிகளையும் உன்னதமான முறையில் நிறைவேற்ற ஊக்குவிக்கும் நோக்கத்துடன் இந்தக் கடிதத்தின் உள்ளடக்கம் எழுதப்பட்டுள்ளது. தயவுசெய்து இதனை எப்போதும் மனதில் கொள்ளுங்கள். உங்களது பொதுச் சேவை பயணம் மிகச்சிலருக்கே கிடைக்கக்கூடிய அரும்பாக்கியம், குறிப்பாக எதிர்க்கட்சியுடன் நிற்கும் நம்மைப் போன்றவர்களுக்கு, என்பதை எப்போதும் எண்ணத்தில் நிலைநிறுத்துங்கள். உங்கள் பதவியை நீங்கள் மிகச்சிறந்த முறையில் பயன்படுத்துவீர்கள் என்றும், நீங்கள் படைத்த சாதனைகளை நினைத்து எதிர்காலத்தில் பெருமைகொள்ளும் வண்ணம் விடாமுயற்சியுடன் திட்டமிடுவீர்கள் என்றும் நம்புகிறேன். உங்கள் பதவிக்காலத்தை வலுப்படுத்திக்கொள்வதற்குக் கடின உழைப்பும் கட்டொழுங்கும் அத்தியாவசியம் என்பதை, நீங்கள் ஏற்கனவே உணராதிருந்தால், கூடிய விரைவில் உணர்வீர்கள்.

    சுய மரியாதையுள்ள நாடாளுமன்ற உறுப்பினர்

  4. பாட்டாளிக் கட்சியின் நாடாளுமன்ற உறுப்பினர் பாட்டாளிக் கட்சியின் ஒரு தலைவரும் முக்கிய பிரதிநிதியும் ஆவார். இதை நீங்கள் ஒருபோதும் மறக்கக்கூடாது. நீங்கள் சுயேச்சை நாடாளுமன்ற உறுப்பினராக வாக்குகளைப் பெறவில்லை, பாட்டாளிக் கட்சியின் கொடியேந்தியாகவே வாக்குகளைப் பெற்றீர்கள் என்பதை எப்போதும் நினைவில் கொள்ளுங்கள்.

  5. நீங்கள் கட்சியின் வேட்பாளராகப் போட்டியிடத் தீர்மானித்தபோது, ஓர் உறுதிமொழியில் கையெழுத்திட்டீர்கள். நீங்கள் நாடாளுமன்ற உறுப்பினராகத் தேர்ந்தெடுக்கப்பட்டால், உங்கள் அரசியல் பணிக்கும் தொகுதிவாழ் மக்களுக்கு ஆற்றும் சேவைக்கும் முன்னுரிமை அளிப்பீர்கள் என உறுதிமொழியின் உட்கூறுகளில் ஒன்று குறிப்பிடுகிறது. இது நேர்முகமான உட்கூறாக இருந்தாலும், இதன்பால் உங்களுக்குள்ள கடப்பாடே உங்கள் தொகுதியிலும் நகர மன்றத்திலும் நீங்கள் வெற்றி அடைவீர்களா அல்லது தோல்வி அடைவீர்களா என்பதை நிர்ணயிக்கும். தேசிய நிலையில், அரசமைப்புச் சட்டத்தில் இடம்பெற்றுள்ளபடி, ஒரு நாடாளுமன்ற உறுப்பினரின் சத்தியப் பிரமாணம் இதேபோன்ற கடமைகளையும் எதிர்பார்ப்புகளையும் விதிக்கிறது.

  6. பாட்டாளிக் கட்சி நாடாளுமன்ற உறுப்பினராக உங்களுக்குள்ள கடப்பாட்டையும் மனப்பாங்கையும் உண்மையாகப் பிரதிபலிப்பது இணையத்தில் உங்களுக்குக் கிடைக்கும் “லைக்ஸ்”களின் எண்ணிக்கையோ, பகிர்வுகளோ அல்லது நேர்மறையான கருத்துகளோ அல்ல, நீங்கள் அடித்தளத்தில் செய்வதும் நாடாளுமன்றத்தில் சொல்வதும்தான். பாட்டாளிக் கட்சி நாடாளுமன்ற உறுப்பினர்கள் வாரந்தோறும் நிறைவேற்றவேண்டிய குறைந்தபட்ச அடித்தள எட்டுதலுக்கான தரத்தைக் கட்சி வகுத்துள்து. வாராந்தர இல்ல வருகைகள், உங்கள் தொகுதியில் மேற்கொள்ளும் நடை உலாக்கள் ஆகியன இதில் உள்ளடங்கும். நீங்கள் முதல் தவணைக்கால நாடாளுமன்ற உறுப்பினராகப் பதவி ஏற்றிருந்து, உங்கள் தொகுதியில் கட்சியின் இருப்பை நிலைநாட்ட முற்பட்டால், இதற்குத் துணையாக மற்ற தொகுதிசார்ந்த பணிகளும் மேற்கொள்ளப்படவேண்டும். “அடித்தள நாடாளுமன்ற உறுப்பினராவதிலும்”, உங்கள் தொகுதிவாழ் மக்கள், சக சிங்கப்பூரர்கள் ஆகியோரின் பேரார்வங்களையும் அச்சங்களையும் பிரதிநிதிப்பதிலும் உங்களுக்குள்ள தனிப்பட்ட கடப்பாட்டையும் விழைவையும் பொறுத்தே உங்கள் முயற்சிகளில் பெரும்பகுதி அமையும்.

  7. உங்களது பதவிக்காலம் ஆகச்சிறந்த முயற்சிகளுக்குத் தூண்டுகோலாக இருக்கவேண்டும் என நீங்கள் விரும்பினால், உங்களது செயல்பாடுகள் அனைத்திலும் துறைமைப் பொறுப்புடன் இருக்க விரும்புவதும் பொதுமக்களின் கூர்ந்தாய்வுகளை ஏற்க விழைவதும் அவசியம். உங்கள் பணிக்கு ஆதரவளிக்க ஒரு பில்லியன் வெள்ளி நிதியுள்ள அடித்தள அமைப்பு உங்களுக்கு இருக்காது. இதனை ஒரு பெருஞ்சுமையாகக் கருதி செயல்பாடின்மைக்குத் தள்ளப்படவோ, அல்லது அதைவிட மோசமாக, தொகுதியில் உங்களது தனிப்பட்ட ஈடுபாட்டுக்கும் கவனிப்புக்கும் உள்ள சக்தியைக் குறைத்து மதிப்பிடவோ கூடாது. உங்களது தொண்டூழியர்களுடன் சேர்ந்து அடித்தளப் பணிகளை மேற்கொள்ளுங்கள். உங்கள் தொகுதியில் உள்ள வீடுகளுக்கு வழக்கமான வருகைகள் மேற்கொள்ளுங்கள், கடைகளுக்கு நேரில் செல்லுங்கள். குடியிருப்பாளர்கள், உணவங்காடிக்காரர்கள், வணிக நிறுவனர்கள் ஆகியோரைத் தெரிந்து கொள்ளுங்கள். உங்கள் தொகுதிவாசிகள் இதைவிடக் குறைவான தகுதியுடையவர்கள் அல்ல. ஆக முக்கியமாக, உங்கள் நகர மன்றத்தின் பணியைக் குடியிருப்பாளர்களிடம் தெரியப்படுத்தும் விதத்தில் அணுக்கமாகக் கவனம் செலுத்துங்கள். செயலின்மை, அலட்சியம் அல்லது இயங்காமை வலைக்குள் சிக்கிக்கொள்ளாதீர்கள். இல்லாவிடில், நாடாளுமன்ற உறுப்பினராகப் பதவி ஏற்றிருந்த தவணைக்காலத்தைப் பின்னோக்கிப் பார்க்கையில் வருத்தமும் தனிப்பட்ட ஏமாற்றமும் அடைவீர்கள்.

  8. நகர மன்ற அதிகாரி என்ற முறையில், நீங்கள் பொது நிதிகளின் காப்பாளர். இதில் மிகுந்த கவனமாகவும் எச்சரிக்கையாகவும் இருந்து, செலவினங்கள் அனைத்திற்கும் முறையான அங்கீகரிப்பு நடைமுறைகளோடும் கட்டுப்பாடுகளோடும் எழுத்துறுதி அளிக்கப்பட்டிருப்பதையும், நகர மன்ற நிதிநிலை விதிமுறைகளுக்கு உடன்பட்டிருப்பதையும் உறுதிப்படுத்துங்கள். அடித்தள நாடாளுமன்ற உறுப்பினர் என்ற முறையில், அடிக்கடி நகர மன்ற நிர்வாகத்தினர், அலுவலர்கள் ஆகியோருடனும், இடையிடையில் நகர மன்றத்தின் குத்தகையாளர்களுடனும் நீங்கள் தொடர்பு கொள்வீர்கள் என எதிர்பார்க்கப்படும். உங்களது சகர நகர மன்ற அதிகாரிகளுடன் சேர்ந்து, உங்கள் நகர மன்றத்திற்கு உயர் தரங்களை வகுத்திடுங்கள். ஊழல் தொடர்பான சட்டங்களை எப்போதும் கவனத்தில் கொண்டு, எந்தவொரு குத்தகையாளரின் தகாத வற்புறுத்தலுக்கும் அடிபணிந்துவிடாதீர்கள்.

    நாடாளுமன்றம்

  9. கட்சி எதுவாக இருந்தாலும், பின் இருக்கையரின் நோக்கம், பதவியிலுள்ள அரசாங்கத்தைக் கண்காணிப்பதாகும்.

  10. ஆளும் கட்சி தோல்வியைக் கண்டு துவளப்போவதில்லை. ஏனெனில், ஒவ்வோர் இடத்தையும் வெல்லவே தேர்தலில் போட்டியிடுவதாக அவர்கள் தெளிவாகக் கூறியுள்ளனர். அவர்களது நாடாளுமன்ற உறுப்பினர்கள், நாடாளுமன்ற விவாதத்தின்போது உங்களது நிலையையும் கருத்துகளையும் கூர்ந்தாராய உரிமை பெற்றவர்கள். மக்கள் செயல் கட்சியின் பல்வேறு நாடாளுமன்ற உறுப்பினர்கள் விறுவிறுப்பான கேள்விகளுடன் வெவ்வேறு கோணங்களில் அல்லது அம்சங்களில் உங்களைத் தாக்குவார்கள் என எதிர்பார்த்திருங்கள். நாடாளுமன்ற ஜனநாயகம் எதிர்வாதமாக வடிவமைக்கப்பட்டிருப்பதால், இதைவிடக் குறைவாக நீங்கள் எதிர்பார்க்கக்கூடாது. மக்கள் செயல் கட்சியின் எண்ணிக்கை மேலோங்கியிருப்பதால், நாடாளுமன்றத்தில் நீங்கள் உச்சரிக்கும் ஒவ்வொரு சொல்லும் கூர்ந்தாராயப்பட்டு, நீங்கள் அல்லது கட்சி ஏற்கனவே சொன்னவற்றுடன் ஒப்பிட்டுப் பார்க்கப்படும் என எதிர்பாருங்கள்.

  11. நாடாளுமன்றத்தின் நிலையான ஆணைகளைப் படித்துப்பார்த்து, எத்தகைய கேள்விகள் அனுமதிக்கப்படுகின்றன என்பதை உறுதிப்படுத்திக் கொள்ளுங்கள். உதாரணமாக, உங்களது எதிராளிகள் நிலையான ஆணைகளைச் சரியாகப் புரிந்துகொள்ளாமல் பேசினால், குறிப்பிட்டதோர் ஆணை குறித்து தீர்ப்பளிக்குமாறு நாயகரை அணுகத் தயங்காதீர்கள். ஆனால், நிலையான ஆணைகள் உங்களுக்குப் பழக்கப்பட்டிருந்தால் மட்டுமே இதையெல்லாம் உங்களால் செய்யமுடியும். உங்களது நாடாளுமன்றக் கேள்விகளையும் உரைகளையும் தயாரிக்கும்போது அல்லது நாடாளுமன்றத்தில் விளக்கம் கேட்க எழும்போது, உங்களது சொந்த நோக்கங்கள் குறித்து உங்களிடமே கேள்வி கேட்டுக்கொள்ளுங்கள். உங்கள் பதில் சிங்கப்பூர் மற்றும் சிங்கப்பூரர்களின் நலன் மேம்பாடாக இருந்தால், அச்சமின்றி தொடருங்கள்.

  12. உங்கள் பதவிக்காலம் ஒரு நெடுந்தொலைவு ஓட்டம். நிலையான செயல்பாடு இறுதி மதிப்பீட்டுக்கு முக்கியம். நமது அரசியல் எதிராளிகள் அடுத்த தேர்தலில் உங்களை வீழ்த்துவதற்காக, அல்லது ஏதாவதொரு வாய்ப்பு கிடைத்தால் பொதுமக்களின் பார்வையில் உங்கள் சுயமதிப்பைக் குறைப்பதற்காக, தங்கள் வசமுள்ள ஒவ்வொரு வளத்தையும் பயன்படுத்துவார்கள் என்பதை எப்போதும் நினைவில் கொள்ளுங்கள். சமூக ஊடகத்தில் நேரடியாக, அல்லது மாற்றாள்களின் மூலமாக, மேற்கொள்ளும் தாக்குதலும் இதில் உள்ளடங்கும்.

  13. நீங்கள் நாடாளுமன்ற அமர்வுகள் அனைத்திற்கும் வருகையளித்து, அமர்வு முழுவதும் இருக்கவேண்டும் என எதிர்பார்க்கப்படுகிறது. நாடாளுமன்ற அமர்வுக்கு இடையில் நீங்கள் வெளியேற வேண்டிய அவசியமிருந்தால், கட்சிக் கொறடாவிடம் அல்லது துணைக் கொறடாவிடம் எழுத்துபூர்வ அனுமதி பெறவேண்டும். இதுதவிர, நீங்கள் பேசவிருக்கும் அல்லது ஏற்கனவே பேசிய ஒரு மசோதா அல்லது தீர்மானம் விவாதத்திலிருக்கும்போது நீங்கள் அவையில் இருக்கவேண்டும். கட்சி தனது நாடாளுமன்ற உறுப்பினர்கள் நாடாளுமன்றத்தில் ஈடுபாடு கொள்ளவேண்டும் என்றும், அடிக்கடி நாடாளுமன்றக் கேள்விகளைத் தாக்கல் செய்யவேண்டும் என்றும், மசோதாக்கள் பற்றி பேசவேண்டும் என்றும் எதிர்பார்க்கிறது. உங்களது செயலாற்றல், உங்கள் குறுக்கீடுகளின் தரம், நாடாளுமன்றப் பங்கேற்பு ஆகியவற்றை வாக்காளர்கள் கூர்ந்து கண்காணிப்பார்கள்.  

  14. நாடாளுமன்றச் (சலுகைகள், அதிகாரங்கள், விதிவிலக்குகள்) சட்டத்தை, குறிப்பாக அன்பளிப்புகள் பெறுதல் தொடர்பான சட்ட விதிகளைப் படித்து தெரிந்துகொள்ளுங்கள். ஐயப்பாடு இருந்தால் தலைமைச் செயலாளரிடம் அல்லது தலைவரிடம் கேட்டுத் தெளிவுபடுத்திக் கொள்ளுங்கள். சிங்கப்பூர் குடியரசின் அரசியலமைப்புச் சட்டம், ஊழல் தடுப்புச் சட்டம் ஆகியவற்றையும் நன்கு பழக்கப்படுத்திக் கொள்ளுங்கள்.

  15. சிங்கப்பூர் நாடாளுமன்றத்தைப் பிரதிநிதித்து அல்லது மற்ற அதிகாரத்துவப் பொறுப்புகளின் அடிப்படையில் நாடாளுமன்றப் பயணங்களில் அல்லது அதிகாரபூர்வ வெளிநாட்டுப் பயணங்களில் செல்ல நீங்கள் அழைக்கப்படலாம். இப்பயணங்களில் செல்ல நீங்கள் ஊக்குவிக்கப்படுகிறீர்கள். சிங்கப்பூர் ஒரு சிறிய நாடு என்பதால், அனைத்துலக அரங்கில் சிங்கப்பூர் ஒருமித்த நிலைப்பாட்டுடன் குரல்கொடுப்பது முக்கியம் என்பதை நினைவில் கொள்ளுங்கள். தேசிய நிலைப்பாடு குறித்து அரசாங்கப் பிரதிநிதிகளிடம் அல்லது உங்கள் நாடாளுமன்றச் சகாக்களிடம் கலந்துபேசுங்கள். ஐயப்பாடு இருந்தால், அல்லது அதிகாரத்துவ நிலைப்பாட்டை ஆதரிப்பது சங்கடமாக இருந்தால், தலைமைச் செயலாளரிடம் அல்லது தலைவரிடம் கேட்டுத் தெளிவுபடுத்திக் கொள்ளுங்கள்.

  16. ஒரு நாடாளுமன்ற உறுப்பினராக, முறைப்படியான / முறைப்படியல்லாத சந்திப்புகளுக்கும் கலந்துரையாடல்களுக்கும் வெளிநாட்டுத் தூதரகங்கள் அல்லது அவற்றின் பிரதிநிதிகள் உங்களை அழைக்கக்கூடும். இத்தகைய அழைப்புகளை ஏற்பதற்கு முன்பாக, நீங்கள் தலைமைச் செயலாளரிடம் அல்லது தலைவரிடம் எழுத்துபூர்வமாகத் தெரியப்படுத்த வேண்டும்.

    பாட்டாளிக் கட்சி நாடாளுமன்ற உறுப்பினராக நீங்கள் பதிக்கும் முத்திரை

  17. இணையம்வழியான அல்லது இணையம்வழி அல்லாத பொது உரைகள், ஊடகத்துடனான சந்திப்புகள், மேற்கோள் அல்லது கருத்து கேட்டு ஊடகத்தினர் செய்யும் கோரிக்கைகள் அனைத்திற்கும் ஊடகக் குழுவின் தலைவரிடம் அனுமதி நாடவேண்டும். ஊடகக் குழுவின் தலைவர் உங்கள் பங்கேற்புக்குத் தலைமைச் செயலாளரிடம் அல்லது தலைவரிடம் அனுமதி நாடுவார்.

  18. ஏதாவதோர் அமைப்பின் அல்லது சங்கத்தின் அழைப்பின்பேரில் பொது உரை ஆற்றுவது பற்றி பரிசீலிப்பதற்குமுன் கவனமாகச் சிந்தித்துப் பாருங்கள். நீங்கள் அழைப்பை ஏற்க முடிவெடுத்து, கட்சியும் உங்கள் பங்கேற்புக்கு அனுமதி அளித்தால், உங்கள் நோக்கத்தையும் பார்வையாளர்களிடம் எடுத்துச்சொல்ல விரும்பும் முக்கிய கருத்துகளையும் நன்கு பரிசீலனை செய்யுங்கள். இந்தக் கருத்துகள் கட்சியின் நிலைப்பாட்டுக்கு ஒத்துப்போவதோடு, சிங்கப்பூர் அரசியலில் கட்சியைப் பகுத்தறிவுமிக்க, மதிப்புக்குரிய, பொறுப்பான அமைப்பாக எடுத்துக்காட்டவும், விசுவாசமுள்ள எதிர்க்கட்சியாகப் பாட்டாளிக் கட்சியின் நிலைப்பாட்டை வலுப்படுத்தவும் துணைபுரியவேண்டும். ஐயப்பாடு இருந்தால், கருத்துக்கான எந்தவோர் அழைப்பையும் ஏற்பதற்கு முன்பாக ஊடகக் குழுவின் தலைவரிடம் கலந்தாலோசனை செய்யுங்கள். அமைப்பின் மற்றும்/அல்லது உங்கள் பங்கேற்பின் முத்திரைக்குத் தவறான அர்த்தம் காணப்படுமா, அரசியலாக்கப்படுமா அல்லது மேம்போக்கானதாகக் கருதப்படுமா என உங்களிடம் கேட்டுக் கொள்ளுங்கள். அப்படியிருந்தால், அது அரசியல் அறிவீனமாகவும், பொறுப்பற்ற செயலாகவும் இருக்கக்கூடும்.

  19. உங்கள் அடித்தளத் தொண்டூழியர்களை மெத்தனமாகக் கருதாமல், அவர்களை அடிக்கடி ஈடுபடுத்துங்கள். கட்சியின் கொள்கையை ஆதரிக்க முன்வருபவர்கள் உண்மையானவர்களாக என்பதை எடுத்தவுடனே உறுதிப்படுத்திவிட முடியாது என்பது அரசியலின் இயல்பு. தொண்டூழியரின் நன்னடத்தை விதிமுறைகளை வழிகாட்டியாகக் கொண்டு, உங்கள் பங்கிற்கு முன்னுதாரணமாகத் திகழ்ந்து அவர்களை வழிநடத்துங்கள். தொண்டூழியர்கள் நட்பாகவும் ஆதரவாகவும் இருந்தாலும், உங்களிடம் தலைமைத்துவத்தை எதிர்பார்த்து, உங்கள் செயல்பாடுகளை அணுக்கமாகக் கவனிப்பார்கள் – உங்கள் கவனம் நாடாளுமன்ற உறுப்பினராக உயர்த் தகுதியடைவதிலும் தனிப்பட்ட செல்வாக்கை வளர்த்துக்கொள்வதிலும் அதிகமாக இருக்கிறதா? அல்லது சமூகத்தில் உங்களைப் பதித்துக்கொள்ள நேரமும் முயற்சியும் செலவிட்டு, குடியிருப்பாளர்களின் பிரச்சனைகளுக்கு உடனுக்குடன் தீர்வுகண்டு, பிரச்சனைகளைக் கண்டறிவதில் முனைப்பு காட்டும் உண்மையான அடித்தள நாடாளுமன்ற உறுப்பினரா? ஐயப்பாட்டைத் தவிர்க்க, முந்திய பிரிவின்கீழ் வரும் பாட்டாளிக் கட்சி நாடாளுமன்ற உறுப்பினருக்கு நாடாளுமன்றத்தில் இடமில்லை என்பது திண்ணம்.

    மக்கள் சந்திப்பு கூட்டங்களும் குடியிருப்பாளர்களுடனான கருத்துப் பரிமாற்றமும்

  20. உங்கள் பணியின்போதும், மக்கள் சந்திப்பு கூட்டங்களின்போதும், அரசாங்கக் கொள்கைகளில் குறைபாடுகளைச் சுட்டிக்காட்டும் தனிமனிதர்களை நீங்கள் சந்திக்கக்கூடும். அதைக் கேட்டு எந்த முடிவுக்கும் வந்துவிடாதீர்கள். முதலில் அந்த விவகாரம் பற்றி உங்களால் முடிந்த அளவுக்கு விவரமறிய முயற்சி செய்யுங்கள். அதோடு, அந்த விவகாரத்தை நியாயமான முறையில் மதிப்பிடுங்கள். உதாரணமாக, அந்த விவகாரத்தின் பின்னணியிலுள்ள கொள்கை காரணங்களை நீங்கள் போதிய அளவு விசாரித்துவிட்டீர்களா, அந்தக் கொள்கையை மேம்படுத்த முடியுமா, உள்ளார்ந்த காரணங்களால் அவ்விவகாரத்திற்கு விளக்கமளிக்க முடியுமா? போன்ற சிந்தனைகள் உங்கள் மனதில் எழவேண்டும். சில விவகாரங்களில், புற நோக்கத்தை அல்லது நாட்டத்தை மேம்படுத்திக் கொள்வதற்காக நீங்கள் அல்லது உங்கள் பதவி தவறாகப் பயன்படுத்தப்படுகிறதா என்பதையும் நீங்கள் யோசித்துப் பார்க்கவேண்டும். நீங்கள் சிங்கப்பூரின், சிங்கப்பூரர்களின் நலனுக்காகச் சேவை செய்கிறீர்கள் என்பதை ஒருபோதும் மறந்துவிடக்கூடாது. எது எப்படி இருந்தாலும், பாட்டாளிக் கட்சி நாடாளுமன்ற உறுப்பினர் மீதான எதிர்பார்ப்பிற்கேற்ப, அவ்விவகாரத்திற்குப் பச்சாதாபத்துடன் தீர்வு காண்கையில் திறந்த மனப்பான்மையை நிலைநாட்டுங்கள். உங்கள் குடியிருப்பாளர்களின் நம்பிக்கையை ஈட்டுங்கள்.

  21. உங்களால் எல்லா கோரிக்கைகளையும் நிறைவேற்ற இயலாது. பச்சாதாபத்தையும் பரிவையும் இழந்துவிடாமல், குடியிருப்பாளர்களிடம் நேர்மையாகவும் உண்மையாகவும் நடந்து கொள்ளுங்கள். ஒரு குடியிருப்பாளரின் கோரிக்கைக்கு உங்களிடம் பதில் இல்லாவிட்டால், அதுபற்றி விசாரித்துவிட்டுச் சொல்வதாக அவரிடம் கூறுங்கள். சொன்னபடி தவறாமல் செய்யுங்கள்.

  22. ஒரு குடியிருப்பாளருக்கு உதவி புரியும் அல்லது ஒரு விவகாரத்தை முன்னெடுத்துச் செல்லும் உங்கள் உத்வேகத்திலும் கடப்பாட்டிலும், அரசாங்க அதிகாரிகளையும் பொதுமக்களையும் கையாளுகையில் பணிவன்பாகவும் துறைமைப் பொறுப்போடும் நடந்துகொள்ளுங்கள். ஒரு விவகாரத்தைச் சம்பந்தப்பட்ட தரப்பினரின் கவனத்திற்குக் கொண்டுசெல்ல, பொறுப்பதிகாரிகளுக்கு அல்லது மற்ற கட்சிகளின் நாடாளுமன்ற உறுப்பினர்களுக்கு நீங்கள் கடிதம் எழுத வேண்டியிருக்கும்.

    மக்களைச் சென்றடையும் சுத்தியல்

  23. சுத்தியல் (Hammer) வெளியீட்டின் விற்பனை கட்சியின் மத்திய நடவடிக்கையாகும். ஆண்டு முழுவதும் பாதிக்கும் மேலான ஞாயிற்றுக்கிழமை காலை நேரங்களில் இந்நடவடிக்கை நடைபெறும். ஒரு நாடாளுமன்ற உறுப்பினர் இந்நடவடிக்கையில் பங்கெடுத்து, கட்சியின் செய்திக்கடிதத்தைப் பொதுமக்களிடம் விற்பனை செய்ய உறுப்பினர்களை வழிநடத்திச் செல்லவேண்டும் என எதிர்பார்க்கப்படுகிறது.
    முடிவுரை

  24. இந்தக் கடிதம் ஓர் அடிப்படை வரையறையை வழங்கும் நோக்கத்துடன் எழுதப்பட்டுள்ளது. இதனைப் பின்பற்றி நடந்தால், ஒரு நாடாளுமன்ற உறுப்பினராக வெற்றிகரமான, மனநிறைவான பதவிக்காலத்தைப் பூர்த்தி செய்வதற்கான அடிப்படை உங்களுக்கு அமையும். பாட்டாளிக் கட்சி நாடாளுமன்ற உறுப்பினர் செய்யவேண்டியவை, செய்யக்கூடாதவை அனைத்தையும் எந்தவோர் ஆவணத்திலும் ஒன்றுவிடாமல் துல்லியமாக உள்ளடக்க இயலாது. உங்கள் பதவிக்காலம் வெற்றிகரமாகவும் பயனுள்ளதாகவும் அமைவதை உறுதிப்படுத்தக்கூடிய வழிகாட்டியையும் எந்தவொரு கட்சியாலும் வழங்க இயலாது. அடித்தள முனைப்புகளில் நீங்கள் காட்டும் சுயக் கட்டொழுங்கு, கடப்பாடு, துறைமைப் பொறுப்பு ஆகியனவும், நாடாளுமன்றத்தில் செயலாற்றலுடன் சிங்கப்பூரர்களைப் பிரதிநிதிக்கவேண்டும் என்ற உங்கள் விருப்பமும்தான் உங்கள் வெற்றியை அல்லது தோல்வியை நிர்ணயிக்கும்.

  25. உங்களுக்கு எனது மனமார்ந்த வாழ்த்துகள்.